03年7.1之後，香港政壇仲熱鬧過樂壇，民間智庫不斷湧現，除咗唔少志同道合嘅後生仔醉心研究公共政策，連一啲過氣高官都湊吓熱鬧。新力量網絡噚日搞咗個施政報告前瞻嘅論壇，吸引咗香港政壇上20、30、40、50世代嘅猛男濟濟一堂，齊齊論政。
新力量網絡研究總監葉健民話，參加論壇嘅講者當中，有20幾歲嘅Roundtable副總幹事游錦安、代表30來歲專業人士嘅三十會解端泰。葉博士呢個代表40幾歲人士嘅組織，見到呢班後生仔，就好似衞蘭見到衞詩咁，自己都未上到位，啲後浪就係咁湧嚟。
同台嘅政制事務局局長林瑞麟，下個月就51歲生日，睇怕呢位50世代，真係要小心隨時俾人淘汰。噚日畀面到場「學嘢」嘅匯賢智庫理事會主席葉劉淑儀就開腔評論特首選戰，佢話暫時睇好煲呔曾，皆因梁家傑係大律師出身，缺乏管理經驗喎。