你到40歲仲有無「巴沙新加坡小品」老闆Wendi咁青春？無吹水，佢今年40歲，唔好話你唔信，我都好驚訝，但同佢話當年，年份歲數絕無破綻，「我23歲由新加坡嚟香港，當年好多後生女都發明星夢，都有唔少星探搵過我㗎，但我唔係咁鍾意上鏡，咁耐拍過一個郭富城MTV玩吓咁囉。」唔發明星夢，咁嚟香港玩乜呀？Wendi：「我好鍾意扮靚Shopping，以前追名牌子，𠵱家少咗囉，不過都一樣咁鍾意買衫買袋。」見佢一身打扮的確係又潮又Young。
「我35歲結婚，本來諗住移民美國，咪學定煮嘢食囉，怕移民後無嘢食嘛。後尾決定留喺香港，咁啱朋友話開餐廳，我咪夾份兼做廚囉。」咪以為佢只顧扮靚入廚房會姐手姐腳，當要求到廚房拍照時，佢二話不說就着圍裙拎鑊鏟，3分鐘就炒好一碟貴刁，廚藝合格有餘嗰隻。咁靚女，有無艷遇？「有時客人都會問我攞電話，或者約我去街，而我就會反問佢哋：『我囝囝畫嘅畫靚唔靚？』佢哋知道我有仔女，會知難而退，最緊要唔好畀錯Signal人哋嘛。」
記者：黃若茵
攝影：伍慶泉
胡椒蝦時價約$188
Wendi：「蝦走油，要加黑胡椒同蒜頭炒，炒出嚟嘅蝦肉先會入味。」以為好辣，試過微辣中帶甜，先甜後辣，好有趣。
海南無骨雞飯$58
Wendi：「新加坡人食嘅海南雞飯無骨㗎，用雞骨熬湯，清淡得嚟有鮮味。」雞肉勁滑，點新加坡黑豉油最夾。
特色鮮蛤炒貴刁$48
Wendi：「鮮蛤係一種貝殼類，我哋經常食㗎！呢啲鮮蛤係泰國飛機貨運過嚟，好鮮甜，加埋蝦同埋魚片一齊炒，好足料。」
食客評分（5分滿分）
關小姐：「Wendi又靚女，又本事，我好鍾意食佢做嘅叻沙，畀5分啦。」
Arianna：「Wendi姐姐好nice，我每次嚟都食一碗雞飯，我畀滿分。」
巴沙新加坡小品（31682057）
地址：灣仔莊士敦道197號地下