衞生福利及食物局局長周一嶽有個花名叫「周一鑊」,即係話佢過完個weekend,星期一返到office肯定有大鑊嘢等佢善後,真係連八方都戥佢辛苦。不過,噚日周局長出席一個心臟健康嘉年華,就好難得唔使俾大班記者追住問呢樣問嗰樣,仲可以輕輕鬆鬆跳番part舞。
話說當時李克勤喺台上唱佢首名曲《紅日》,身後就有班dancer示範跳可以強身健體嘅排排舞,台下嘅周局長好投入咁跟住跳,一時舉吓手一時踏吓地咁,不知跳得幾咁開心。
話時話,佢雖然係第一次跳呢隻排排舞,但好快就上晒手,估唔到曾經自稱「乜波都啱」、年輕時仲諗過做運動員嘅周局長跳舞都咁掂。