意大利喺上周六嘅歐國外主場2:0收死烏克蘭，門神保方仲救咗幾個靚波，可惜佢𠵱家同祖記喺意乙捱騾仔，球迷就好少機會睇到佢嘅演出；有見及此，我哋就專程搵咗同保方有關嘅片段，畀各位掛住佢嘅球迷止渴！
保方怒踢燈柱洩忿
呢段名叫《BuffonOnScherziAParte》嘅短片，長約4分鐘，係一齣專玩明星球星嘅電視節目嚟，呢次保方就成為咗受害者！或者，保方點樣機關算盡，但都算唔到自己個家姐哥達蓮娜聯同意大利電視台整鬼自己，保方仲俾人玩到發老脾，兩次怒踢燈柱洩忿！
片段中，哥達蓮娜既打爛咗保方女友屋企個花樽，在餐廳食飯時又「唔覺意」推跌晒張枱啲嘢；之後仲「唔小心」咁炒埋車，保方真係喊都無謂；我諗如果搞事嘅人唔係家姐，保方隨時唔踢燈柱，當龍門球咁一腳掘過隔籬都似；片尾，哥達蓮娜驚動埋「警察」，真係有幾大玩幾大！
保方家姐擺明玩嘢，又阻住佢同愛人sweetsweet，唔怪得保方嬲到不受控制，平日斯文形象一朝喪！不過想幫保方兜吓，事關意大利人平日溝通都係動作多多，踢燈柱算係「剛中帶柔」嘅行為㗎喇！
http://www.youtube.com/watch?v=c1rjBJJQHRc