民主黨過去一直係香港民主運動先鋒，好多嘢都靠佢哋成班大佬推動。可惜，近年因為黨爭問題，搞到形象麻麻，加上又有明星大狀黨搶客，支持度不復當日。但咁啱喺呢個時候，同少壯派關係唔多好嘅主席李永達急流勇退，極有機會由好好先生何俊仁接棒，正正提供一個大和解良機。據聞仁哥已經準備約見少壯派，同佢哋傾吓點樣搞好個黨，槍頭一致對外，總好過散修修任人狂砌咁慘淡。
點解呢個係主流派同少壯派嘅和解良機？查實都係因為timing好兼人選啱啫。有白鴿黨黨員話，高達唔選，至少已經令一班少壯派冇咗好多怨憤；其次，正如八方所講，仁哥係一個易話為嘅yesman，冇高達咁倔，比較肯聽意見，主流派容易接受啲。
重整旗鼓迎區選
再者呢，都關乎少壯派自身利益嘅，因為07年區議會選舉就快殺到，如果白鴿黨再唔重整旗鼓，少壯派喺地區都冇運行，唔通真係要一拍兩散先安樂咩？另一個白鴿黨員就話，爆出黨內派系之爭後，自己成日俾街坊問：「你哋做乜成日鬥來鬥去呀？」形象認真差。直至仁哥為正義俾人扑濕頭，白鴿黨先有番少少人氣，唔好嘥咗呢個振作再起飛嘅契機就真。
雖然仁哥真係唔想做主席，但係為咗黨嘅前途，相信佢都唔做唔得，所以除咗開始埋班之外，佢仲已經開始約見黨內各派系人士，包括最難搞嘅少壯派，希望喺上任之前，先團結黨內力量。
八方得悉少壯派中唔少人都支持仁哥揸大旗，而且佢哋見到個黨殘晒，都想尋求和解。仁哥有機會坐正，少壯派都放聲氣想見仁哥，睇吓大家有冇偈傾。聽聞仁哥已經點頭，希望大家可以三口六面拆掂派系之爭。
年底換屆好頭痕
與此同時，白鴿黨黨內唔少資深黨員都蠢蠢欲動，希望喺年底換屆選舉佔一席位，幫手搞好個黨，例如已經不問黨事多年嘅狄志遠，眼見個黨七國咁亂，心痛之餘，都話會出山選副主席，希望個黨生生性性。不過，現任中常委馮煒光都唔執輸，話自己都會去選副主席，仲對狄志遠參選表示「奇怪」，話阿狄早前都未話過會去選喎。
被視為少壯派嘅現任副主席陳竟明又冧唔冧莊？佢話唔答呢個問題住，總之有人選就係好事。高達都係咁話，認為越多人選就越好。八方都希望兩派和解成功，咁就真係還得神落。