立法會主席范徐麗泰同公民黨黨魁余若薇噚日一朝早參加綠色力量舉行嘅「世界清潔日在香港」，同一百名義工去到香港仔郊野公園，幫啲冇公德嘅賞月人士執手尾。兩名尊貴阿太用行動證明佢哋絕對唔係高人一等，其中范太認真落力，彎低身執垃圾之餘又出力鏟蠟迹；余若薇就執起啲人BBQ後留低嘅腸仔同雞翼，話可以攞番屋企做餸，仲批評留低食物嘅人好浪費，叫佢哋好好反省。
好心有好報，范太做完義工，下晝就即刻拉頭馬。佢隻愛駒「另具一格」跑尾場千四米，范太同埋仔仔入場觀戰，結果愛駒爆出30倍大冷門，幫范太贏咗63萬獎金。
范太同八方講，由於賽前知道對手好多，因此對愛駒信心唔大，家陣食尾糊贏馬，真係令佢喜出望外。