曾特首先前發起，同埋廖局長日日喺電視賣廣告嘅「藍天行動」，有無成效到家陣都仲係未知之數，之但係政府買車嘅方針，睇嚟日後可能會有變喎！點解？因為最近有消息指出，話家陣政府入面合共有9部混能車輛（HybridVehicles）正在使用中，而且全部都係Toyota嘅出品，其中最Top嘅AlphardHybrid留咗畀特首辦之外，其餘8部Prius嘅足迹則遍布多個政府部門，例如環保署、運輸署、機電工程署、消防處及警務處等等，等Prius可以喺唔同嘅政府部門入面執行唔同嘅職務，睇吓部車嘅可靠性。
早兩日路經灣仔嗰陣，就見到嗰部「拉晒」警察車花嘅Prius行過，可惜事出突然，所以搞到影唔到佢個車頭，真係要同大家講聲Sorry！之不過，既然政府都咁睇重呢類混能車輛，咁點解曾特首同唐財爺到家陣都唔肯提供稅務優惠，當益吓班用家之餘，順便幫「藍天行動」做吓宣傳呢！
記者、攝影：鄭達基