輕盈託夫 送餅換獎
早排嗲精約公仔廂高層食飯，點知俾傳媒影到相，話佢想趁台慶頒獎禮前向高層拉票，其實唔止嗲精一個，原來嫁咗人嘅輕盈都好識做，雖然佢人唔喺香港，返咗內地拍嘢，但都有趁中秋節叫佢老公幫手訂水果籃同月餅送畀班高層同幾個監製，閒閒哋嗰度都使咗萬幾兩萬蚊。老實講，佢應該心知肚明今年女主角獎輪唔到佢，但都依然咁落力同班高層聯絡感情，唔知佢想博乜呢？
豬仔追胸 勞師動眾
台灣巨胸自從俾杰撻撻撇咗後，好友豬仔一直對佢關懷備至，擺明車馬要追佢。本來豬仔同巨胸、杰撻撻都係好朋友，但因為巨胸對杰撻撻因愛成恨，豬仔只好投其所好，同杰撻撻劃清界線，不過咁唔代表可以順利奪取芳心，皆因巨胸始終對杰撻撻未忘情，而且豬仔根本唔係佢鍾意嘅類型，但豬仔冇放棄，仲出動埋女經理人埋堆，女人同女人傾偈方便好多，豬仔要打探巨胸啲嘢都方便啲，可惜愛情唔係玩政治，用腦未必得，所以至今仍未得手。
米粉無謂 臭味情緣
米粉同無謂撻得着，初頭關仁諗極都唔明，兩個大纜都扯唔埋，點會突然間變一對呢？原來佢哋除咗鍾意運動外，仲「臭」味相投，因為大家都係名副其實嘅「小狐仙」。雖然米粉同無謂只係「狐味」輕量級，但男嘅喺大熱天時味道梗濃郁，至於女嘅就至鍾意着畀胳肋底唞氣嘅小背心，關仁聽過同無謂合作拍戲嘅女演員講，有時佢拍完外景，匿喺外景車上嘅換衣間換衫，真係對手揚幾揚，廠車即飄香，但咁尷尬，大家又唔好意思同佢講，惟有揑住個鼻死忍囉。
Textby關仁