公民黨下個月開第一次會員大會，由黨員選舉黨領導層，但係呢個時候，江湖傳聞一直做緊秘書長嘅鄭宇碩教授，有意劈炮唔撈，喺𠵱家呢個時刻，任何呢類風吹草動，自不然會引起好多不必要嘅無謂政治猜測，特別係又會俾人話公民黨內部不和呀諸如此類。
請假一年不忘協調
不過，公民黨老友話，鄭教授冇錯係會暫別公民黨黨務一段時間，但佢老人家仲會選秘書長㖭，只不過教授要做研究，未來一年內都可能冇時間花太多精力喺公民黨黨務入面，所以若然佢老人家成功當選，佢就會請一年假，暫時由其他人代理住個秘書長工作。
之但係，鄭教授除咗要處理公民黨內工作之外，仲要搞埋政黨選舉協調，再加埋鄭教授已經搞緊民主派區議會選舉嘅協調工作，所以點唔得閒，都唔會唔理政黨協調，事關喺民主派入面，要搵到好似鄭教授咁吃得開嘅人，真係唔多！