閏七月真係邪，三十五日之內有三宗貨車倒車撞死路人，好彩今晚六點半後，閏七月過去，農曆八月到臨（以節氣計），希望以後唔好再發生呢類意外。
肥仔Ｋ自東京回來過中秋，睇完新聞，話千祈唔好迷信，倒車意外純與安全意識與道路狹窄有關。安全意識方面，倒車司機要十萬分緊張，視察周圍環境，以最慢速度倒車；行人方面，過馬路要望左望右，望前望後，一睇到有貨車倒後行，應該在車頭橫過馬路，唔好在車尾步過。
好似有一本英文書叫做《你在哈佛商學院學的，幼稚園已教過晒》，內容係講普通生活常識在商界的應用。肥仔Ｋ所謂嘅，相信幼稚園老師在課室都講過唔少，點解啲成年人屢屢犯錯呢？唔通人嘅年紀愈大，愈係要返幼稚園補課而唔係去讀大學校外課程？
肥仔Ｋ在東京住宿舍，鄰近四季酒店，酒店大門前面，有大幅石屎平地，足夠旅遊巴士/的士同時停低，而平時往往只有三四架旅遊巴停在離開正門幾十碼外嘅路邊，照計唔會有意外啦。肥仔Ｋ說：「好佩服日本人啲安全意識，旅遊巴熄匙；在完全靜止狀態，仍然在巴士後轆之前面後面，擺上黃色硬膠三角形物體，『攝』住車轆，防止巴士突然後滑或向前，以免發生意外！」
日本人重視安全，不惜增加成本，佢哋在火車站、地鐵站內改建，工地全部用圍板冚住，行人經過，睇唔到工人開工，同樣情況，香港只會在「高級」地方出現，例如置地廣場大裝修、機場裝修、文華酒店裝修。咁高程度嘅安全意識，唔係免費嘅，成本會高好多，成本最後轉嫁在消費者身上，由社會集體付鈔，我哋去日本旅行，經常話啲物價好貴，其實內裏已包含安全成本，日本人了解多啲，唔會嘈，唔會多投訴。我哋香港人就鍾意食免費午餐，故此好多方面都將貨就價，唔願孭上安全成本，出事時，各安天命嘞。