肥姐沈殿霞早前被《東周刊》副總編輯的印傭潛入深切治療部偷拍，嚇得她要求轉到保安較嚴密的私家病房休養，昨日她繼續留在私家病房休息。對於該周刊副總編輯的印傭潛入病房偷拍事件，一眾藝人都對此行為感到不齒，張家輝直斥手法過份，方力申則謂應予懲罰。 採訪：楊潔雯、馬建華、卓美娟
張家輝：畀時間立法
張家輝昨日在屯門拍電影時說：「唔好話係印傭，打劫殺人警方一日半日都可以拉到人，何況𠵱家係當場捉到，警方點會查唔到真相？係有就有，唔需要太多解釋，冇任何理論可以支持呢啲做法。今次手法當然過份，唔止對肥姐，我唔係針對《東周刊》，總之就係唔理人死活去做，今次再惹起公憤，我覺得要畀時間政府立法，身為藝人一定支持立法阻止偷拍。」
方力申：教育唔奏效
方力申早前為鍾欣桐（阿嬌）被偷拍事件挺身力斥傳媒歪風，前晚他在沙田運動場出席中秋節活動時說：「唔應做嘅事都做咗咯，作為藝人咪慶幸冇出到啲相。肥姐嘅病況係大家都關心，但都唔應該騷擾佢。」之前眾藝人為阿嬌怒斥傳媒，似乎起不到阻嚇作用，小方對此說：「係囉，唔係好奏效，市民大眾都唔知進一步係點，話教育記者唔好影，消費者唔好買，全部都唔得，咁就應該有懲罰，我等緊有呢一日。」
李彩華：覺得好恐怖
李彩華昨日在小西灣出席活動時說：「覺得好恐怖，病已經好辛苦，仲要咁樣俾人騷擾，咁做真係好唔應該，邊個病人想俾人影呀，覺得欣宜都好慘，但係佢都好叻女，見佢每日都用咁多時間去陪媽咪，真係好乖。」
子華采兒：會危及病人
黃子華和應采兒昨日在西九龍中心宣傳電影，子華說：「大家都好關心肥姐嘅病情，呢件事真係好嚴重同好令人反感，仲有喺ICU嘅其他病人嘅心臟功能未必都如平常人一樣，咁樣俾人嚇一嚇，分分鐘對生命有危險，真係要檢討吓係咪要立法處理呢種採訪手法。」
應采兒則說：「人哋病都唔畀空間人好好休息，連喺醫院都要偷拍，去偷拍人哋結婚嘅都算啦，屋企人有病並唔係喜事嚟㗎！」
陳煒：盼同業有操守
陳煒在屯門拍戲時則說：「捉咗個女傭，雜誌又冇登到啲相，可以話死無對證。𠵱家做藝人都冇保障，惟有希望同業操守良好，唔好再有咁嘅事情發生。」
周麗淇：有警惕作用
周麗淇前晚在海洋公園出席活動時說：「捉到人咪好囉，最緊要唔好騷擾肥姐，不過唔騷擾都騷擾咗啦！今次事件有個警惕作用，叫人唔好咁過份。」
