申銀（218）5月以嚟一直打底，睇位撈底，博佢中線翻半番。申銀06年度中期（6月止）純利爆升8倍幾，到5023萬銀，兼且遠遠超出05年度全年純利2686萬銀。就當申銀06年度純利，都係5023萬銀，PE已經可以落番9倍水位。
要咁睇，呢期港股逼近新高，二三線股遲早炒到飛起，有利申銀呢一季以至明年上半年業務。再講，申銀除咗本港股市，亦兼營深、滬兩地B股股票買賣。即係話，申銀相對同業，有多瓣搵銀途徑。而深滬B股市場，年頭以嚟，已經翻半番，又估吓申銀掂唔掂？
好保守估計，申銀06年度純利去到7530萬銀，預期PE落番6倍幾。以申銀現價（0.91元）計，博佢翻半番到1.36銀，預期PE都係講緊9.5倍，若然短期大市有震盪，吼實0.8元撈底，以呢個價位計，升到上1.36元，潛在升幅高達70%，值博率仲吸引。
廸臣兜緊底
廸臣（262）由4月到家陣，一路兜緊底，日線圖三條主要平均線已經叠埋一齊，要昅昅。廸臣今年4月，先舊後新配股，又發行可換股票據，引入基金PentaInvestment。票據換股價講緊0.45元，同廸臣現價（0.48元）差無幾，大孖沙肯定未夠喉。
又計埋呢次配股及票據攤薄因素，廸臣NAV仲有0.72元，現價折讓33%，仲有NAV墊底。廸臣若然有勢行，嚟轉短打，博一兩成升幅，未有耐到NAV水位。
錢雋