去澳門，唔係入賭場就係去大三巴，今次一於去遠啲，去比氹仔仲要遠嘅竹灣。竹灣有乜好？有海灘，有間用木炭烤爐烤Pizza嘅餐廳。坐低，Order，等8分鐘，熱辣辣Pizza話咁快奉上，鍾意Hea嘅，可以喺餐廳坐低慢慢食；懶浪漫嘅，餐廳對開唔夠十步就係沙灘，吹住海風食Pizza，一樣咁正，我話嘅。
記者：黃若茵
攝影：林栢鈞
模特兒：Ada（TheGroup）
準時8分鐘上碟
澳門細，搭的士好少畀多過$20，今次去竹灣，打的竟然要20分鐘。落車，沿海邊小路行到盡頭，終於搵到「陸舟餐廳」，下午時段客人唔多，不過外籍員工依然熱情招待。翻開餐牌，我問呢度最掂係乜，店員即答：「Pizza。」「不過我好肚餓喎，食Pizza閒閒哋要等30分鐘，點算？」「唔使，8分鐘，保證有得食。」真係？就信你一次。
對錶，計時，我八卦，行去開放式廚房昅師傅整Pizza，唔使幾分鐘師傅已經搓好薄餅，放好餡料。咦？點解師傅揸住個長鏟嘅？負責人Raymond話：「因為要用鏟兜起個Pizza放入傳統意大利Woodoven，個爐Keep住有300℃至400℃高溫，熱空氣喺圓拱形爐入面不斷循環，可以將Pizza快速烤熟之餘仲可以鎖緊水份。」無吹水，Pizza準時8分鐘上碟，咬落仲好Juicy㖭。
望望，餐廳外國客人似乎比較多，Raymond話：「外國人鍾意陽光與海灘嘛，好多時佢哋游完水就會過嚟食嘢囉，所以夏天生意好好。」黃昏時段，坐餐廳露天茶座吹海風好歎，「係呀，日落時份啲客就鍾意坐外面睇靚景，到咗夜晚就鍾意坐番入面正正經經食餐飯。」我就同模特兒Ada一樣，鍾意攞件Pizza去海灘慢慢歎喇，好Mood啲嘛。
蠱惑仔薄餅$59
點蠱惑仔法？店員都唔知喎。餡料有番茄、MozzarellaCheese、酸菜同鯷魚，味道偏鹹，食唔慣鹹較難接受，我就覺得叫鹹濕仔薄餅較貼切喇。
火辣辣薄餅$51
餐廳唯一一款辣味薄餅，餡料有亁辣椒、青椒、青胡椒、蒜茸、番茄等，名就叫火辣辣，不過辣度只屬中等，香噴噴勁正。
生牛肉片伴檸檬汁沙律$65
牛肉片切得夠薄，檸檬汁同橄欖油香味可以完全滲入肉身。肉質夠腍，夾住沙律菜一齊食，咬落多一種爽脆口感。
意大利火腿拼盤 細$55中$70大$95
拼盤上碟，等你試多幾種口味，除Parmaham外，仲有脂肪分布平均嘅米蘭香腸同高巴火腿，前者煙熏過味道好香，後者入口勁煙韌。
海鮮意粉$65
普通，但足料，餡料有大蜆、鮮蝦、魷魚同青口，海鮮味滲入每條意粉，好鮮，湯汁入口香濃，最重要係唔會太杰影響口感。
肉醬餃子$65
餃子即叫即做，餃子皮軟滑煙韌，包住豐滿嘅菜肉餡料，加埋勁Creamy嘅芝士汁，每啖都好Full。
搵食攻略
陸舟餐廳（853-880156）
地址：路環竹灣馬路（竹灣泳池側）
營業時間：11:00am-11:00pm
交通：碼頭乘的士約$100，或乘21A、25、26A巴士於竹灣海灘站下車
全店座位：100個
人均消費：$150
最好賣：Pizza，日賣22份