噚日梁智鴻以安老事務委員會主席身份，出席首屆護老者高峯會，開場白就大讚與會嘅護老者咁好笑容，仲靚過中秋月，咁好口才即刻博得全場掌聲。梁智鴻講，長者要有自己嘅形象，唔應該靠後輩，應該當佢哋係朋友，否則雙方都有壓力。佢話自己父母生前，佢哋七兄弟姊妹都盡量為佢哋做嘢，盡咗子女責任。
70歲甘草演員羅蘭姐亦喺同一場合，追憶93年尾專登休假半年，照顧當時老人病愈嚟愈嚴重嘅年逾90歲阿媽，佢話護老要好有耐性，𠱁細路咁𠱁，因為佢哋雖然神志唔係咁清醒，但仍會妒忌同呷醋，所以要體恤吓。佢話，就算阿媽嗰陣時瞓覺自己都好驚，得閒就會睇吓老人家個心有冇郁；仲有一次佢好似武俠小說人物咁，一個箭步接住就快跌低嘅媽媽，十分驚險。老人家後來仙遊，但相信生前種種，永世都會留喺女兒回憶裏。