儘管個個睇完《達文西密碼》都話失望，偏偏全球票房報捷，哥倫比亞立即宣布開拍前傳《天使與魔鬼》，仲話圍繞主角蘭登嘅一系列故事已攞晒電影版權，玩其西方衞斯理系列；儘管個個知道套戲冇乜娛樂性，偏偏港版3區一出即成碟場之霸，老闆仲話超豪版BoxSet賣成四嚿水依然斷市，原因肯定係附送嘅精緻密碼筒！
記者：徐影龍
上星期有《X-Men3》5個版本登場，今個禮拜《達文西密碼》都唔執輸，港版3區DVD一口氣推出單碟版、雙碟版同超豪華珍藏BoxSet，連VCD都有兩個封面俾你揀，睇得出廠商有心延續電影上畫時嘅全民解碼氣氛。幾個版本中以超豪華珍藏BoxSet最有噱頭，一個禮盒包含6大物件，解碼錦囊、畫晒符號嘅籣登筆記本，而最吸引嘅肯定係密碼筒複製品！雖然並非跟足電影比例咁大嚿，不過做得相當細緻，拆開仲有網址同一串密碼俾你玩！加埋日後必炒嘅編號證書，賣$380斷市都唔出奇。
DVD禮盒裝解碼（$380）
1.精美硬皮外盒
2.限量珍藏密碼筒
3.密碼筒解碼錦囊（破解密碼筒之用）
4.羅柏蘭登解碼筆記本
5.珍藏證書連編號
6.雙碟裝DVD
靚音效襯莊嚴建築
《達文西密碼》原著小說涉及大量中世紀歐洲建築物，電影版可算無一遺留全部重現。由法國羅浮宮、倫敦西敏寺到蘇格蘭共濟會教堂全部有得睇，的確令如筆者般冇機會歐遊嘅人士一開眼界。未知是Master母帶定壓碟問題，戲內大部份陰暗嘅場景，暗渣（噪訊）情況頗嚴重。由於筆者用Plasma睇，技術上有別於靠光管發光嘅LCDTV，所以黑位層次特別分明，「粒粒」全部無所遁形，畫質同《X-Men3》比真係差一皮！有台灣影音發燒友就估計好多藝術品唔受得燈光，故拍攝時擺唔到一般電影嘅「燈陣」，下下要避開唔夠光就惟有靠「谷」啦！
相反音效卻是最出色一環，主角一行人係歐洲四圍歷險解謎，去到唔同嘅古老建築物，都各有一段出色背景音樂，筆者尤其喜歡尾段蘭登回到羅浮宮找出謎底一段，柔揚至激昂樂曲交接得天衣無縫，遠處低沉鼓聲亦帶出一種恍然大悟嘅興奮心情，dts低壓縮率長處得以發揮！睇番BonusDisc先知原來搵咗近60人演奏片內音樂，最後仲出埋電影SoundTrack㖭。
搵景傷神過做CG
單碟版基本上只有電影內容，而雙碟版就多嘢睇得多；兩段製作特輯道盡搵景及拍攝上嘅辛酸；苦苦哀求法國政府協助，幾番周旋先允許到羅浮宮實地拍攝，最後限制咗只可拍4晚，每晚由11點到天光5點就要走人。攝製隊急急腳度位、打燈、睇毛片等，所以好多戲份都係後期喺錄影廠補拍，最明顯係館長被槍擊後，除衫扮維特魯威人嗰幕。另外得唔到西敏寺允許拍攝，又要四圍搵大教堂，最後卒之搵到去林肯市大教堂先最接近原著設計。據說係出自西敏寺同一人設計，難怪連原作者丹布朗都話似。
BonusDisc另一較吸引地方，就係電影解碼環節，不過並非為觀眾詳述歐洲宗教史或達文西作品，而係真正為電影內出現過嘅符號或象徵物作解說。原來好多有意義嘅物件偷偷放在背景內，唔㩒暫定掣都好難發現！如銀行地板出現嘅符號、電梯旁嘅海報等，全部都有故事，幾得意㗎。
後話：唔緊張嘅驚慄片
單睇演員陣容，《太陽神13號》導演、湯漢斯、尚連奴、柯德莉塔圖等，擺明係荷李活A級大製作。電影全球同步上畫時氣勢磅礡，的確滿懷期望買飛入場睇。可惜電影為交代全部劇情，情節過度濃縮，歐洲幾個地方全部走馬看花，筆者之前睇過原著，明白劇情但冇驚喜；友人未睇過原著，有驚喜卻不懂劇情！總括嚟講，千萬別抱輕輕鬆鬆睇驚慄片心情觀賞，對宗教歷史有興趣者例外。祈禱下一套講反物質嘅《天使與魔鬼》更有睇頭。
