冰山美人薛凱琪（Fiona）終於交上鄭融（Stephanie）這位新朋友了，她們忽然friend到打破唱片公司門戶之見，攜手開音樂會，更組團飛往東瀛自由行，但經過同房共處後，大家在無遮無掩下流露真實個性，結果都竟像孩子一樣，老是狗咬狗骨，愛恨交織。
Fiona恨Stephanie太敏感，所以總無意踩親她條尾，但偏偏愛她待友坦白誠實；Stephanie愛Fiona對原則企硬，卻爆她介懷豐胸傳聞多過被嘲長頸。
這天好姊妹公開互篤對方可恨、可愛和可悲之處，兩人時而耳語，時而高key私片，又是哈哈笑又是牙癢癢，實在有趣。到齊玩心理測驗時，也顯示了前世撈亂骨頭，兩位少男殺手的確有緣有份。 撰文：朱倬誼
F：Fiona（薛凱琪） S：Stephanie（鄭融）
可恨之處
性格敏感累事
F：「好多嘢佢太sensitive（敏感），唔係壞性格，但太多sensitive嘅時候，可能會令到身邊人覺得今次做一件事，會唔會令佢有啲乜嘢呢？可能講一句嘢，覺得我窒佢，咁我係咪應該諗，係咪真係窒到佢呢？係咪窒到佢唔知，會令我好confuse，呢件事係我哋去日本旅行時發生，後尾大家都有同大家saysorry。
「件事就係……知道大家要趕時間去一撻地方買嘢，係planA定planB，我提議planB，佢話planA，我只係話『其實去planB先，唔係嘥你好多時間！』就係咁樣，佢以為我窒佢囉。」
過份堅持原則
S：「佢嘅可恨亦都係可愛嘅嘢。譬如佢嘅堅持，可能我唔係一個每樣嘢都堅持自己諗法嘅人，但佢每件事都係，呢啲係佢嘅優點，但有時會變咗一個缺點。」
可悲之處
望將心結打開
F：「佢係有好多感覺、感受嘅人，無論喺工作上或者私人嘢，影響到佢工作嘅都唔係實際嘢，譬如做騷，production唔係咁好，但佢係好professional，所以只會影響到佢心理，佢有好多秘密，有啲人公還公、私還私，私人嘢唔開心唔會帶到工作，但佢感情豐富，會影響到佢工作情緒，呢樣嘢幾可悲。佢嘅心結能夠打開，事業會更上一層樓。但我好開心可以成為佢嘅傾訴對象。」
謠言影響情緒
S：「佢唔介意人哋點睇佢，但如果唔係事實、寃枉佢嘅嘢，佢會介意到影響情緒，自己開心同唔開心都被人操控住，呢樣幾可悲。之前有本雜誌影到佢睇中醫，話佢豐胸，（F插嘴：但個胸完全冇大到，好可悲囉）影響到佢好唔開心，就算真係整大個胸，都冇乜所謂，（報道）都唔知影響咗佢幾耐。」
可愛之處
信朋友唔保留
F：「佢敢去表達自己，我覺得佢可愛在於表達自己鍾意同唔鍾意。做藝人有好多嘢要保護自己，但佢信一個人時，會講好多嘢畀對方聽，可以話佢唔夠protect，同佢講電話時，會feel到佢講自己嘢畀你聽，女藝人之間係會有好多矛盾，仲要唔同公司，但佢肯去trust人，都幾可愛。」
友善發自內心
S：「唔知心裏面係咪啦，哈哈。我覺得Fiona可悲同可愛係同一件事，都會有好嘅。佢內心好有自己原則，點樣選擇朋友、着衫，佢都好有自己一套，好難被人動搖到。啲人話佢長頸，唔係好覺，夾硬攞嚟講，仲講咗好耐，生出嚟就係咁㗎啦，二十幾年啦，𠵱家講唔會影響到佢。我唔覺得佢自閉，佢見每個人都有hello有笑，唔係扮好友善，我自己仲封閉啲㖭。」
攝影：陳志嵐
髮型：堇ofHairCulture（鄭融）
服裝：ZTAMPZ（鄭融）
場地：LaBrasserieofGatewayHongKongMarcoPoloHotels
