葉宇澄委屈扮青蛙

葉宇澄噚日喺藍灣半島出席活動，見到成班扮成小熊維尼嘅小朋友，佢話令佢回憶起細個時扮青蛙王子嘅遭遇。原來佢細個時做過舞台劇，仲扮青蛙王子，不過佢搞笑咁話嗰時覺得好委屈，因為青蛙王子太醜喇，所以成日都諗幾時到扮王子嗰部份呀。到大個咗，佢話都鍾意扮鬼扮馬，萬聖節時仲扮過紙紮公仔出街，不過冇人認得出佢咁話。