星級秋冬衣櫃──藝人換季必買之選

星級秋冬衣櫃──藝人換季必買之選

李詩韻 獨愛長靴

「我每年冬天都會買長boots,因為長boots可以着到對腳好修長,同埋今年仲係好興毛毛,毛毛又係我至愛,所以今年必買一對長毛毛boots,牌子就冇特別鍾意,好多時我會上網係外國訂,貪一定唔會同人撞,又可以隨時隨地任揀,唔使花時間去行街。」

葉佩雯 假Fur襯衫

「今年秋冬季必入fur毛毛帽,我唔會買真皮草,我會買假fur,着真皮草好殘忍。呢啲帽唔係度度都買得到,好多時我會上網bid,而且causal啲可以襯牛仔褲,隆重啲配襯又得,披起嚟都唔會好老成。今年整個秋冬季都係金色,但自己就唔會跟風,反而我會配襯紅色衣物,好多時我自己設計搵人做,咁就一定唔會同人撞衫。」

郭羨妮 必備皮褸

「轉秋冬季,我就必買靴同皮褸,呢兩樣嘢係秋冬必備之物,皮褸基本上每年冬天都會興,所以一定準備定。至於靴就用嚟襯裙同褲都得,我會買定一、兩對全新,花費都唔會太多,幾千蚊就OK。我買衫最注重quality(品質),我唔會盲目跟潮流,當然如果嗰期興嗰隻顏色,我都會入定一、兩款襯衫,最重要係着上身啱自己同着得靚。」

周麗淇 闊袍遮肉

「今季必買,就係又闊又長又大件嘅冷衫,最啱就係遮住拜拜肉,有幾個牌子我一定會買,好似A/T咁就啱晒我嘅style,佢有好多闊袍大袖嘅冷衫,長大褸都好靚。
「我又覺得MarcJacobs嘅大褸款一向好有style,好型,一件大褸加長boots就可以出街,易襯又方便。」

黃子華 最愛皮靴

「我諗會選擇買對皮boots,用嚟襯牛仔褲或者西褲都得,甚至用嚟襯短褲都仲得,香港嘅冬天有時真係冇幾日凍,買其他冬天禦寒嘅物品,分分鐘成個冬天過埋,可能一次都未着過,所以太厚嘅冬天衫我基本上唔會買太多,買鞋就肯定唔受天氣影響,一定會用得着,所以呢個秋冬季,我會推介皮boots係必買item。」

許懷欣 頸巾護喉

「男仔換季唔使準備好多嘢,不過我會入定冷帽同頸巾嚟襯衫,加上我哋做歌手喉嚨好重要,所以天氣轉冷,有條頸巾保護喉嚨會好啲。我會喺網上搵,冷門啲就託我朋友搵,預算每次換季都會使3、4千蚊。另外,因為我鍾意用LV,所以使得最多錢就係買LV啲銀包、眼鏡。」

陳豪 沉實冬裝

「每逢轉秋冬季,我都會買定多幾條頸巾用嚟襯衫,盡量搵啲靚嘅頸巾。我唔會跟潮流,只會着啲靚得嚟又唔會太搶嘅服飾,突出自己嘅性格。好多時我會親自去選購服飾,因為好衫難求,如果遇到靚衫我都會立即買,唔係轉過頭可能已經冇晒,呢啲係可遇不可求,費事冇買到,第日後悔啦。」

黃宗澤 型仔窄褲

「之前潮流興闊身牛仔褲,不過今年秋冬,男仔會興番窄身少少嘅牛仔褲,我已經買咗一條,啱啱就買咗一條Lee同其他牌子嘅crossover,貪佢個款夠特別。
「我又睇咗好多時裝雜誌,發覺今季DiorHomme牛仔褲啲cutting都唔錯,有時間都會去搜購一下。」
採訪:楊潔雯、駱華齡

葉佩雯

郭羨妮

周麗淇

黃子華

許懷欣

陳豪

黃宗澤