過咗中秋$20平睇白海豚

廸士尼？又細又貴，昂坪360？久唔久就半天吊，驚喎！人造景點硬係玩得唔過癮，趁得大嶼山，不如落大澳玩好過。又睇棚屋呀？係，不過係睇新建棚屋；又坐船出海睇將軍石？都係，不過有中華白海豚沿途送行，船家話呢期最多白海豚出沒，果然無吹水，尾程睇埋鹽田一帶新植紅樹林區，邊個話大澳無新嘢玩㗎？
記者：蘇振鵬
攝影：伍慶泉
模特兒：Wiyona、Bee、Harry、Yukis

將軍石側睇最似

香港吉祥物中華白海豚數目少兼神出鬼沒，人人都想睇，不過啲乜乜追蹤海豚一日團要成三嚿水，仲唔擔保一定睇到喎，咁貴不如去鬼屋玩哈囉喂好過。其實睇海豚$20搞掂啦，去到大澳永安街同街巿街以前搭橫水渡位置，自有船家兜搭，我哋坐觀光艇出海半粒鐘，先睇將軍石，將軍石打側睇似將軍，無腳唔識走；不過海豚都無腳，但識游。上船前我問：「係咪真係睇到海豚㗎？無得睇係咪回水先？唔回水我擲你落水㗎。」船家實牙實齒話：「肯定有，呢期好多海豚出沒，不過唔好問我點解。」同行香港生態旅遊學會甄永樂導師話：「過咗中秋最多白海豚出沒，信我。」出到海，果然見到一條二條粉紅色光脫脫嘅白海豚，一時擺尾一時跳出水面，有幾條仲撲嚟撲去不知幾開心，船家果然無吹水。

■大澳地標將軍石，相傳鹹濕將軍屢非禮良家婦女，遭天譴變成石頭，側面睇確實幾似，頭胸腹腳齊全，畀啲想像力，仲突出埋不文之物㖭。

■側面睇似，但正面睇乜都唔似。

■觀光小艇出海，船家開得幾快，海風食到飽一飽。

■Wiyona（右）與Bee：「好得意呀啲海豚，好想摸吓佢，粉紅色好靚呀。」

鹽田新種紅樹林

政府為補償興建赤鱲角機場帶嚟嘅生態破壞，喺鹽田一帶海濱重新種植12公頃人工紅樹林，仲加設海濱長廊，剛於上年竣工。紅樹一棵棵棟喺沼澤，日落陽光反射水面，加上有白鷺、招潮蟹、彈塗魚同你打招呼，個景認真唔錯，睇埋無敵大海景同金黃鹹蛋黃先走，OK滿足。

■長腳白鷺，在紅樹林都可見到。

■招潮蟹，雄蟹其中一隻蟹箝好大，顏色鮮艷。

■彈塗魚，通常在泥上爬行和彈跳，身體修長，尾部扁平。

新建石屎躉棚屋

大澳棚屋已有200幾年歷史，用一條條木樁支撐，望落幾似哈爾移動城堡，一間間排喺水邊殘殘哋老實幾型，不過傳統棚屋正慢慢消失，因為香港已經無乜人曉起，曉起棚屋嘅人都老咯。以前嘅木樁用可以浸水100年而不腐嘅新畿內亞木頭，現代人就貪就手，新建棚屋改用大碌大概10至20年就要換嘅石屎做柱躉，望落係光鮮啲，不過少咗份懷舊味囉。