廖秀冬平時開口埋口都講環保，中秋時節接受香港電台訪問就轉吓口味，講教仔方程式。佢話鍾意畀兩個仔讀傳統學校，學識背公式同尊師重道，同時唔認同國際學校嘅奔放自由，「背到嘅嘢第時讀乜都有個底，讀國際學校樣樣嘢都唔使記。我係古板，太自由會完全冇discipline（紀律）。」
話就話自己古板，八方覺得冬姨都算係開明嘅慈母。因為佢話兩仔細個成績麻麻哋，默書有時攞零雞蛋。尤其有讀寫困難嘅細仔「寧願玩手指都唔睇書」，但係好鍾意彈琴，冬姨就盡情畀佢每日練四粒鐘；大仔就鍾意游水，冬天都照畀佢練水。除此之外，兩兄弟最鍾意打機，每日最少打四至六粒鐘，冬冬於是限佢哋讀書合格先有得打。結果大仔對電子遊戲太有興趣，大學走去讀電腦科學，仲同冬姨講：「阿媽，由細到大你最啱就係准我哋打機。」