奇案電影如《羔羊醫生》及《人肉叉燒包》等，曾經喺香港大受歡迎，如果呢類戲係閣下杯茶，咁《艷屍案中案》（BlackDahlia）就啱晒你，影片以1940年代美國荷李活最凶殘血案為背景，雖然冇例牌嘅李修賢同關寶慧主演，但換上型男佐斯哈尼特（JoshHartnett）同索女施嘉莉祖安遜（ScarlettJohansson），效果可能仲好呢！ 撰文：戶川淳
由佐斯哈尼特同施嘉莉祖安遜主演嘅《艷屍案中案》（BlackDahlia）會喺今個月19號喺香港上映，故事嘅主題係圍繞一單叫黑色牡丹花嘅案件，呢件案喺美國可謂家喻戶曉。1947年1月洛杉磯停車場發現一具恐怖女裸屍，身體被攔腰砍斷、大部份器官遭生挖、臉部更被刀從左耳劃過嘴巴到右耳，造出可怕嘅小丑笑容。警方調查後，發現死者原來係B級片小明星伊莉莎伯（ElizabethShort美雅嘉絲蒂娜飾），由於佢死時長髮散開好似一朵盛開嘅黑色牡丹花，兇案因而命名。
至今未破案
據悉伊莉莎伯死前曾遭兇手用棍棒攻擊及強姦，死狀之恐怖，令唔少流傳下來嘅照片都不能公諸於世。然而洛杉磯緝兇半個世紀，至今始終未能破案。黑色牡丹花案案情複雜，當時荷李活烏煙瘴氣，黑道大哥、下流嘅片廠主管、貪污警察等，個個都想佔伊莉莎伯便宜，各人互相包庇下，令調查陷於困局。
呢宗驚世懸案，吸引《幕後嫌疑犯》犯罪小說大師占士奧特洛（JamesEllroy）於1986撰寫出半紀實小說《BlackDahlia》，解開案中嘅千絲萬縷。小說推出後甚為暢銷，荷李活導演爭相想拍成電影，經過廿年兜轉，執導過《職業特工隊》同《義膽雄心》嘅殿堂級導演白賴仁狄龐馬（BrianDePalma）終於得到呢個機會。
情陷三角戀
本片唔只想探索「誰是兇手」咁簡單，更想講案件身邊嘅人如何被捲入漩渦萬劫不復，從而塑造占士口中「罪惡、性慾、超級病態」嘅1940年代洛杉磯。例如佐斯哈尼特飾演嘅警探，竟搭上同袍女友姬莉（史嘉莉祖安遜飾），同時又被神秘富家女瑪德蓮（希拉莉史雲克飾）迷惑，查案之餘搞出淫亂三角戀，上演一幕幕火辣床戲。佐斯同施嘉莉仲戲假情真成為情侶，早前更被傳買樓同居，你話佢哋係咪好投入角色呢？
