美人示威 盼被翻啅
美人呢排去到邊都拖住佢嗰位公子男友，擺明係想向全世界晒自己幾幸福，但唔少人都覺得佢拍拖嘅目的，只係想向前男友示威，激發人哋再追番自己。
雖然咁講講到美人好有機心咁，但又唔怪得人哋咁諗佢嘅，事實上美人咁多年嚟，都一直有同前男友聯絡，仲不時講心事同感情狀況，睇得出佢對前男友仲未死心，而前男友一直以嚟都好關心佢，所以美人會唔會同番前男友一齊，真係冇人估得到。
失意女星 負荊請罪
失意女星早排得罪咗老闆，搞到周身蟻，為咗前途，失意女星終於放低佢嘅尊嚴，向老闆道歉認錯。
關仁有朋友上星期一晚見到失意女星夜晚九點幾喺老闆屋企行出嚟，佢當時戴咗副好大嘅黑超，但因為身高關係，關仁嘅朋友一眼就認出佢，佢頭耷耷咁自己一個上咗保母車，唔知佢負荊請罪，老闆有冇原諒佢呢？
假音女友 放料捱罵
中年禿頭嘅假音人歌星同經理人公司原本仲有成年先約滿，但經理人公司因為走咗個搖錢樹大笑姑婆，好驚連佢都俾人撬走，所以急急腳同佢傾續約，咁假音人就乘機要求主力喺電影圈發展，要有多啲話事權，不過之前佢嘅老闆就唔多妥假音人嘅助手女友成日喺度干涉公事，有次仲搞出個大頭佛，因為佢女友好鍾意將其他歌星啲是非話畀記者知，藉此討好記者，但因為愈搞愈離譜，假音人老闆終於頂唔順，鬧咗假音人女友一鑊。
Textby關仁