韓君婷早幾個月患上厭食症而變成火柴人,近排病況明顯好轉,噚日凌晨,關仁喺中環蘭桂坊見到佢一拖二連踩兩場。韓君婷唔單止圓番又靚番,精神又好咗,半夜三更仲鬼打咁精神,同男伴傾偈時手舞足蹈,行路勁度十足,比起之前嘅憔悴病樣,真係判若兩人。
掩面大笑
上個月,本報曾經踢爆韓君婷帶新歡Terence返香閨短敍,之後仲拍拖同遊日本,為伊人慶祝31歲牛一。表面睇嚟,兩人踏入熱戀期,點知噚日凌晨佢竟然喺人月兩團圓嘅中秋佳節撇甩男友,約另外兩名男伴蒲吧,睇嚟佢自從圓潤番後,都出現唔少追求者。
當時大約凌晨點半鐘,着恤衫襯牛仔短裙、長boots嘅韓君婷戴住黑超,牛味十足,同兩位男士蒲完Dragon-i後一齊再去Volar蒲,其中一名華籍型男同韓君婷並肩親熱而行,兩人有講有笑。情緒高漲嘅韓君婷表現甚high,指手畫腳,動作多多,大家講笑時,佢仲好似細路仔咁雙手掩面大笑,同行嘅另一位外籍男伴見佢兩個傾到咁投契,亦都自動墮後。
韓君婷同華籍型男漫步到Volar門外時,由於聚集大批入場人士,對方好細心咁輕搭伊人香肩,傍實佢進場。所以話呢,圓番嘅韓君婷,魅力真係番晒嚟。
採訪、攝影︰娛樂突發組