21歲「SkyLounge」女侍應Joyce出晒名笑容甜美親切，唔係我空口講白話，一眾客人都咁認同，2005年佢贏得酒店舉行嘅「最佳服務員工」選舉，全靠客人投票，得獎原因咪笑容夠燦爛囉。「我淨係識得笑㗎咋，客人嚟到最緊要開心，我梗係要笑啦。」除咗笑，Joyce仲有一把溫柔帶少許嬌嗲嘅聲線，唔冧死客有鬼，「都有客人問我攞電話嘅，咁我咪叫佢打嚟餐廳搵我囉，又試過有個客人話等我放工，不過佢一聽到我凌晨兩點先收工，都無留低等我啦。」現場見好多熟客專登搵佢落單埋單，靚女果然多人搭訕，「都唔係嘅，我記得佢哋鍾意飲乜嘢之嘛。」
人又靚又叻，客人不知幾錫Joyce，某年佢生日，客人特登嚟同佢慶祝，足足坐滿三四張枱。收到客人送嘅禮物佢不知幾感動，不過感動還感動，始終未能打動伊人芳心，因為Joyce早已名花有主，「我男朋友喺酒店另一間餐廳做嘢，佢夜晚12點放工都會等埋我送我返屋企。」各位人客，死心喇，無行㗎喇。
記者：黃若茵
攝影：陳陶鈞
炸水牛芝士$55
Joyce：「炸Pizza常用嘅Mozzarella芝士，咬落特別煙韌香脆，係最受歡迎嘅小吃。」
GreenParadise
$70
混合菠蘿、青蘋果同薄荷，飲落新鮮清涼，記得飲埋面層嘅泡泡，入口即溶好有趣。
食客評分（5分滿分）
SkyLounge（23134245）
地址：尖東麼地道72號香港日航酒店15樓