「離晒譜，本來$5.83可以放902，𠵱家睇住佢落到$5.7。」「出唔到貨」、「login唔到」......
本來，到價而又能沽貨離場，袋袋平安，未嘗不是中秋佳節嘅賞心樂事。不過，上個禮拜五（中秋日），唔少網民喺股市開市約30分鐘後，就走咗上《香港討論區》留言，事緣有人未能登入網上股票交易系統，導致沽唔到貨，睇住個市回，無辦法沽貨。
今次事件主角唔係滙豐，而係中銀個網頁。網友「芝芝吉」首先發現並向其他網友求救，話「BOCWEBSITEDOWN」咗。
中銀香港發言人接受本報查詢時候話，佢哋了解過噚日網上銀行系統並無「down」過，客戶唔能夠登入，有時可能係股票交易繁忙，令到客戶進入嘅時間比較耐，可能客戶因此誤會咗佢哋係「down」機。
網友「lilily」就試過登入，並無問題；佢就建議，登入唔到嘅網友可以重新開機試吓，如果「真係好急咪打電話出貨囉，手續費只貴20元，好過你啲股唔見幾個價位。」都未嘗唔係好嘅建議。