陳方安生宣布明年唔會為曾蔭權陪跑選特首後，民主派就捧出公民黨梁家傑出嚟同煲呔對撼，原來呢場「煲呔vs梁大狀」之爭，係一場同門師兄弟之爭。皆因煲呔係香港華仁校友，梁大狀則係九龍華仁校友，呢兩間名校都係由天主教耶穌會主辦。
港華必勝九華必敗
梁大狀分分鐘連一百張選委嘅票都攞唔到，就算佢好彩攞到入場券，𠵱家北京控制選委得咁嚴，特首之位唔使等到明年都知係煲呔囊中物，所以呢次港華必勝、九華必敗。有九華校友喺網上新聞組話，既然兩校同出一轍，無論邊個贏都係華仁之光喎，真係阿Q精神。
睇番兩人歷史，煲呔64年預科畢業，梁大狀就喺77年中七畢業。港華1919年創校，九華1924年創校，校訓同辦學理念都一樣。有校友話，好彩華仁嘅校訓唔係教學生以最少勞力博取最大利益，否則就會出咗一啲公為私用嘅商家，同見利忘義、隨風擺柳嘅政客。