東京遊戲展之後，PS3規格已告塵埃落定，SONY日前再放出兩款周邊資料，較令人注意嘅係BD遙控器，外形又長又黑，繼承PS3全黑主題，一望便知掌控所有影音功能，若你屬影音發燒友，買部PS3想睇埋Blu-ray影碟、聽埋SACD嘅話，呢款BD遙控就要買埋喇。
單看按鍵數目及種類，已知比XB360那款遙控提供更多功能，可作預校錄影、揀歌、揀Chapter之用，另外遙控以藍芽作傳輸，打破一般紅外線遙控嘅距離、角度限制，Free得多！跟XB360一樣設有「手掣符號」按鍵，而且連L、R1至3按掣都有埋，不過未知能否作打機之用，否則透過遙控上嘅方向掣同符號掣，便可實現單手煲Game儲Level之便，跟任天堂Wii實在有異曲同工之妙！另一款為記憶卡轉換器，PS3已內置硬碟毋須記憶卡，若想玩番PS、PS2舊Game，就要靠轉換器抄番個Save入PS3硬碟內。咦？當Backup都好喎！
記者：徐影龍