淮揚菜唔知係乜？揚州炒飯大家食過嘞啩？「紅樓」最近請嚟國寶級名廚黃寶國坐鎮，佢可以將豆腐亁切到頭髮咁幼當麵食、將脆卜卜蘿蔔切成伸縮自如嘅彈弓：「好味道加上巧手刀工，我煮嘅菜仲可以成為一件藝術品。」3位亮相過《美女廚房》嘅美少女廚神Gladys、Kathy同Emily夠膽死玩挑戰，學整蘭花蘿蔔同湯拌亁絲，結果？證明佢哋得個殼，擺得唔煮得囉。
記者：朱崇德
攝影：楊錦文
鳴謝：英皇娛樂集團
蘭花蘿蔔$48
簡單啲講即係糖醋醃蘿蔔，入口甜而不太酸，選用勁鮮嫩南京蘿蔔，蘿蔔清甜食落無根。師傅好刀工，方形一條蘿蔔柱，放平喺底面兩邊斜切，平放不見斧鑿之迹，筷子一夾變身長長一條彈弓，實際功用係令糖醋接觸面更多更入味，唔係得個睇字㗎。
淮揚最重刀工
店舖名叫「紅樓」，黃寶國師傅話：「紅樓，其實係指《紅樓夢》，呢本書記載咗有好多美輪美奐嘅菜式，唔少食肆都攞嚟模仿做所謂嘅紅樓宴，其實裏面提過嘅菜式，有3都取材自淮揚菜。」講完，師傅一輪刀光劍影，三兩下手勢，蘿蔔變彈弓，豆腐亁變絲，好勁！美少女睇到儍，背脊涼了半截，未拎刀已經後悔上嚟挑戰。睇番資料，原來黃師傅出身揚州百年老店「富春茶社」，喺2002年曾獲國家頒授「淮揚菜烹飪名師」，絕對係國寶級人馬：「淮揚菜特色係選料嚴謹、原汁原味、口味清淡，最講究嘅係一門刀工，就以蘭花蘿蔔同湯拌亁絲呢兩道菜為例，起碼要有10年經驗先做得嚟。」
美女廚房，挑戰輸咗！
湯拌亁絲$68
源自光緒年間的淮揚名菜，3美少女初頭仲誤以為係幼麵，到睇見黃師傅將豆腐亁片到薄如蟬翼，再細切成頭髮咁幼嘅細絲，全部嚇到擘大個口得個窿。豆腐亁絲撈麻油、嫩湖蝦子同醬油一齊食，口感比日本冷麵更細滑。
芙蓉魚米$98
蛋白炒芙蓉？意式芝士炒飯？全部估錯晒！其實係將鮮魚肉打成漿，混蛋白炒成芙蓉，粒粒都炒到米粒咁大，入口細滑如絲魚香撲鼻，一箸夾下滴汁不漏，火候啱啱好。
鬆脆蟹粉河蝦仁$198
蝦仁細粒到似蝦米，上枱嗰吓覺得無乜誠意，放入口先知不得了！河蝦不知比海蝦鮮味N倍，輕炒即熟彈力十足，棚牙有啲捉佢唔住。
香煎八寶飯$48
淮揚菜有薄餅？唔係！原來係將八寶飯香煎上碟，入口唔油膩，餅邊有少少焦中間煙韌綿滑，嗒真啲裏面仲有紅豆夾心，夠刁呀。
揚州炒飯$88
黃師傅曾以此飯奪得93年全國第三屆烹飪大賽銀牌獎，食材有海參、火腿、河蝦，粒粒米都香到爆。
Profile
馮皓詩（Gladys），18歲，《美女廚房》參賽作品芒果布甸：「我嘅撚手天堂菜係炒公仔麵，有茶餐廳水準㗎，最地獄經驗係煮雞翼，奉旨外表金香，裏面唔熟。」
Profile
梁展儀（Emily），22歲，《美女廚房》參賽作品西蘭花炒雞球：「我嘅撚手天堂菜係炒菜心，菜葉菜莖分開炒，包熟！最地獄經驗係整馬豆糕，齋落大菜唔落魚膠粉，食到人嘔。」
Profile
袁家怡（Kathy），18歲，《美女廚房》參賽作品生炒排骨：「我嘅撚手天堂菜係藍莓芝士餅，我兩個姊妹食過都話正。最地獄經驗係第一次整嘅乳酪蛋糕，硬過石頭。」
搵食攻略
紅樓（28936388）
地址：銅鑼灣羅素街8號3樓 座位：180個
交通：銅鑼灣地鐵站A出口
營業時間：11:30am-3:00pm，6:00pm-11:00pm