呂良偉楊小娟夫婦與好友在屋企花園開燒烤派對,熱鬧賞月過中秋之餘,原來他早前一家三口首次到影樓影全家福,囝囝以鬼馬表情扮西部牛仔,神勇雙手揸槍,人細鬼大,令人會心微笑。
呂良偉與太太楊小娟、四歲半兒子Ryan早前在中環VentureStudio影全家福,盡享天倫樂。呂良偉拉住囝囝玩盪韆鞦、騎膊馬,又與太太親熱錫錫,囝囝戴上牛仔帽、雙手揸玩具槍的造型,古靈精怪,表情多多。
乖仔最投入
楊小娟透露首次在影樓拍攝溫馨家庭相,她昨日接受電話訪問時說:「我哋係第一次喺影樓影相,因為之前我同阿呂結婚,係喺法國擺酒,結婚相都只係影外景,同今次感覺好唔同!」
楊小娟透露一家人帶了十多套衣服替換,加上玩具、鞋飾等配搭,她說:「鮮色衫影出嚟嘅顏色會鮮艷啲,我哋影得好快,因為好似喺屋企玩咁,抱吓仔、傾吓偈咁,氣氛好溫暖,兩個鐘頭就影完。」她又表示一向少帶囝囝到公眾地方及出鏡,想不到囝囝卻不怕鏡頭,影得很投入。
爭取家庭樂
提到呂良偉近年主攻內地拍劇,一家人見面機會豈非大減?楊小娟說:「盡量遷就啦,國慶有幾日假,我哋咪到上海探阿呂班,囝囝見到爹哋着古裝不知幾開心,覺得好得意。中秋節我哋一家人喺屋企後花園開燒烤派對,叫埋成班朋友嚟玩,熱熱鬧鬧慶祝。」
採訪:DebbieLum
圖片提供:VentureStudio