胡杏兒早前為拍攝無綫新劇《肥田囍事》增肥40多磅，成為劇集的噱頭，該劇安排在本月底播出，近日無綫陸續推出兩個預告片段為新劇宣傳，其中一片段更以電影《KingKong》為藍本，講述肥杏有如KingKong般被人追殺，而男主角許志安以「死肥妹」大鬧胡杏兒外，又有「肥人污染地球、拖垮宇宙」等字眼，似有歧視身材肥胖人士之嫌。
三部曲宣傳
就《肥》劇宣傳片涉歧視肥胖人士，無綫外事部助理總監曾醒明昨在電話中回應說：「有關宣傳片係由節目部嘅品牌傳播科負責，佢哋其實係將呢部劇以『虛擬世界三部曲』形式推出，第一、二部曲刻意將一般人對肥胖人士嘅心態表達出嚟，下星期播出嘅第三部曲，就會為肥胖人士平反吐烏氣，講出肥唔係錯，內心嘅美麗比外貌更重要。其實佢哋手法有啲似《女王的教室》，𠵱家啲纖體廣告都係話肥人點唔好，我哋只係誇大咗去做，加強出嚟嘅效果，我哋絕對冇歧視成份，請觀眾讀者放心。」
記者昨日就宣傳片一事致電平等機會委員會查詢，發言人羅小姐說：「目前係冇因體形歧視嘅法例，但係有啲人因為疾病而引致肥胖，而經過醫學上證明肥胖係因疾病而引起嘅，如果因為咁遭到一啲包括就業、搵工或其他範疇嘅歧視，咁有可能觸犯殘疾歧視條例。」
採訪：戴彩煥、羅慧敏
