曾蔭權講「強政勵治」，陳方安生宣佈唔競選特首之後，並未放棄批評曾特首，走出嚟講「良政勵治」，哈，一講完之後，食環署竟然產生蝦碌事件，發覺有人為蚊患指數造馬，令一啲地區嘅蚊患指數急跌至零，呢單嘢着實令曾特首尷尬，令陳方安生偷笑。如果曾特首屬下連蚊患指數做唔好，講乜嘢強政吖，講良政就更加啱聽！食環署署長唔好彩咯，須為「強政」、「良政」之辯負上政治責任，醒目嘅就快啲向曾特首解畫。
曾特首有幸委任一位學者張炳良為行政會議成員，張教授寫慣大塊文章，經常為文為政府解畫，不久前寫過一篇銷售稅，前幾日又寫一篇「是強政還是良政？」，相形之下，以前董特首就唔識呢招嘞，故此宣傳戰上永遠處於下風，要知道，委任一位教授入局（行政會議），好使好用㗎。
僱主Ｋ係中小企老闆，對政府「強政」修訂僱傭條例，將佣金納入薪酬計算，就認為不是良政，只會引起更多勞工與僱主鬥法，對建設和諧社會不利。左丁山話：「你哋僱主讓半步咪得囉！」僱主Ｋ講：「唔得，有兩個理由。第一，讓得一次唔讓得兩次，陳婉嫻來勢洶洶，萬一曾特首受唔住工聯會壓力，引入最低工資法，盞大家一齊死；第二，將佣金當薪酬計算，對員工未必有利。僱主可以（a）降低底薪，（b）將抽佣比率調低，（c）定下更高營業quota，（d）將所有有資格分佣金嘅夥計變做合約工，方便將表現唔夠好嘅營業員炒魷；（f）將營銷人員變成自僱人士，如保險經紀。」
嘩！僱主使唔使反應咁激呀？僱主Ｋ話不怕一萬，至怕萬一，中小企業唔係大公司咁好景，有足夠財政儲備，如果中小企執笠，遣散勞工之際，一啲平時收入主要係佣金嘅夥計，一旦計入薪酬總數之內，中小企可能唔夠錢賠，到時點算？總之人人有自己嘅算盤，有人輸咗官司，政府就話要修改條例嚟彰顯立法原意，僱主Ｋ認為不合理。打工仔梗認為合理啦，此所以社會不和諧也。