經過近兩屆世界盃決賽周嘅觀察，西班牙總是強勢地出局。今晚，冇咗魯爾，教練阿拉干尼斯認為係好事，但係，我認為呢個先係噩夢嘅開始！
何出此言？行軍打仗，以老帶新，係合情合理嘅做法。世界盃期間，德國教練奇連士文便深明此理！眼見今晚出戰嘅西班牙，前中後可以倚靠邊個做球隊重心？唔通你仲會寄望佩奧爾嗎？中場又有邊個可以擔大旗呢？
上場對北愛爾蘭，西班牙曾經兩度領先，最終俾對手喺差唔多完場前反勝；教練有責任，球員更有責任，因為佢哋唔識打順境波！今晚又冇選到近況回勇，兼且好搏命嘅魯爾，實在令我擔心西班牙無人領軍！
隨時亂過台灣
最麻煩嘅係，冇咗魯爾呢個大佬，好似當年袁世凱瓜柴後，佢嗰班手下個個想做大佬，搞到中國軍閥混戰！我又擔心西班牙會變成𠵱家台灣咁，出現「挺魯派」vs「倒魯派」！「挺魯派」包括有法比加斯，佢撐魯爾好快會回歸；至於「倒魯派」包括王子費蘭度托利斯，佢叫大家忘記前隊長，備戰最緊要！球隊之內似乎出現咗兩派，利害關係，明眼人都睇到！如果再發展落去，大家要有心理準備，西班牙國家隊內部隨時分裂。喺咁嘅情況之下，又點能寄予厚望！
（9月賺蝕:+13%）
周鵬
商業1台《球迷集中贏》主持
電郵：[email protected]