想當年公屋出售計劃畀各界人士彈到一文不值，有邊個會諗到，當年一層只係賤賣10幾20萬嘅公屋單位，7至8年後轉手閒閒地賺價1倍以上，10幾萬變30幾萬，穩袋20幾萬，喺二手樓市普遍被睇死嘅今日，真係奇迹，而最新一單二手公屋大賺成交，竟然發生喺屯門，就更加係奇迹中嘅奇迹。
祥益胡志偉報料，喺屯門西北區嘅田景邨，屬於99年發售嘅第二期租置公屋之一，15座高層13室，574呎，原業主99年用折上折特優惠價14.37萬購入，早兩日以38萬銀，透過第二市場，即係唔使補地價，賣咗畀個綠表客，賺23.63萬，7年間升值超過1.6倍。
胡經理話，田景邨咁多年嚟估計已有超過六成公屋戶自購單位，大概有2000幾伙，但係二手放盤極少，𠵱家都係得十零個，以最初一、兩年買入嘅盤居多，放盤叫價起碼賺1倍，上面個單位賺得咁盡，算係今年十零宗成交中嘅異數。