「人說人生如夢，我說夢如人生」兩句看透人生嘅歌詞，由息影邵氏明星顧媚姐姐唱出嚟，特別動人。佢由三餐不繼嘅歌廳歌女，到邵氏大明星，憑磁性歌喉獲小雲雀美譽，但因見盡娛樂圈高低起跌，明星好友如林黛、樂蒂先後自盡，決定棄演從畫，成為畫家。
顧媚姐姐當年風姿綽約，大眼睛，尖下巴，配埋經常被人翻唱嘅《不了情》，真係令人「忘不了」。
顧媚姐姐最近寫咗本書，叫《從破曉到黃昏──顧媚回憶錄》（右下圖），由三聯書店出版，下星期有得賣。八方最想睇嘅唔係當年藝壇是非，而係顧媚50年代移居到港，同香港經濟點樣一齊起飛。顧姐姐擁有當年香港人獨有、但買少見少嘅堅毅性格，本身就係一個香港故事。
顧姐姐先後跟隨趙少昂、呂壽琨、胡念祖等名師習畫，10月31日至11月2日仲會喺大會堂舉行「萬水千山總是情──顧氏姊弟三人展」，同細佬顧嘉煇同顧嘉鏘首次舉行畫展，現居加拿大嘅顧姐姐仲會返嚟出席開幕禮。