雖然鬼節過咗，但立法會噚日好多人仲叫捉鬼，莫非鬼門關唔記得閂門？查實，此鬼不同彼鬼，立法會要捉嘅，其實係四隻臨陣倒戈、無投票支持民建聯陳鑑林做財委會主席嘅「反骨鬼」。話佢哋反骨，有人覺得言重咗，但對於民建聯同自由黨嚟講，一啲都唔過份，事關就係呢四條友仔，令有啲運仔嘅卿姐，最終冧莊做主席，親政府陣營只能望住呢個筍位，好似萬梓良上身咁超肉緊地叫一聲："Why？"
究竟呢四隻反骨仔係邊幾個？八方綜合各方意見，覺得最大嫌疑，都係非泛聯盟莫屬。其實按噚日立法會出席人數計，親政府陣營有成29人，泛民主派只得嗰21個；按牌面睇，都知卿姐衰硬。點知點票結果竟然出人意表，係25票對25票。換言之，有四張鑑林票流咗入卿姐度。一睇到點票結果，民建聯同自由黨啲人即刻面燶燶，梗係啦，擺明又有人玩嘢無兌現承諾啫。
泛聯盟嫌疑最大
按照規定，同票就要抽籤定輸贏，唔知係咪個天都幫埋卿姐，由姓氏筆畫最少嘅田北俊金手一抽，ohmygod，竟然係佢冇支持嘅卿姐。卿姐知道後，即刻興奮到成個彈起，舉起V字手勢又豎起手指公，仲好似香港小姐咁繞住立法會半個場走一轉，風騷到痹。
鑑林當然無晒表情，事關佢自以為揸住25至28票，諗住surewin㗎嘛。輸還輸，佢都繼續選副主席，戰果就係佢原先計算嘅29票，相反輸咗嘅大班就只係得泛民嗰21票。唔使講都睇到，有4條友玩緊嘢。
雖然有傳李鳳英同寶baby都係轉軚嫌疑犯，又有傳民建聯同自由黨有內鬼，但據八方所知，除咗身兼行會成員嘅陳智思之外，另外四個泛聯盟根本就用暗票投晒畀卿姐，一則因為佢哋不滿同其他兩大黨傾唔掂數，攞唔到其他小組主席位，二嚟投票之後，只得陳智思一個走去民建聯度話自己投咗鑑林一票，其他四個竟然無晒影，點解呢？
卿姐事後更加話：「如果泛聯盟話唔支持我，都無問題嘅，暗票就係有呢個好處囉。」嘩，幾乎畫公仔畫出腸喇喎。呂明華雖然事後重申，泛聯盟五票都投晒畀鑑林㗎；不過佢無講，嗰時係選緊副主席，唔係主席囉。
