時富金融（8122）噚日宣布撤銷轉主板上市申請，理由係要額外時間編製有關上市文件咁話，今次係繼上月底環康集團（8169）之後，又一間公司搞轉板後撤銷申請。
今年以來，先後有安瑞科能源（3899）及環新國際（502）成功轉往主板掛牌。本來轉去主板，係好多創業板股嘅最終目標，但據聞現時創業板公司轉主板頗為困難，除涉及專業費用高昂，管理層亦要花好多時間搞轉板文件，相比新加坡市場只要填張表格就可以轉板，香港實複雜得多。以安瑞科為例，新股上市費用約1600萬元，但係轉板咁簡單都要500萬元。
要轉主板貴夾煩
正申請轉板的公司，已由6間剩低4間，包括ROJAM（8075）、鄭州燃氣（8099）、山東墨龍（8261）及亞科資本（8088）。另安德利果汁（8259）、物美商業（8277）、利亞零售（8052）及山東威高（8199）則正考慮轉主板。
搞緊嗰4間，最出名應該係亞科資本，呢排成日響網上討論區被網民及股民「問候」，ROJAM過去兩財年盈利分別為5782萬元及4017萬元，表現唔錯，可惜首季盈利大幅倒退，成交也非常疏落。剩低墨龍同鄭燃似乎有得諗，前者做機械可望受惠原材料價格回落，近日股價由2.5元落至2元似有支持，而鄭燃近期在高位橫行，仍未有開車迹象。
歐陽風