畢加索名畫《小丑》進駐九鐵尖東站？睇真啲，原來係九鐵第一次同香港藝術館合作，喺尖東站嘅「九鐵藝術坊」展出巴黎龐比度中心10件珍藏嘅複製品。除咗名畫《小丑》外，仲包括康斯坦丁．布朗庫西嘅青銅雕刻《沉睡的繆斯》、基里科嘅《吉龍．阿波利奈爾的預言肖像》、馬夏爾．雷西嘅《日本製造──大宮女》等等，幅幅都有名堂。
個展覽噚日由九鐵行政總裁詹伯樂、法國駐港澳總領事戴博、康文署助理署長吳志華同埋香港藝術館總館長鄧海超齊齊擔任揭幕禮嘉賓。喺文化沙漠長大嘅八方，成日俾人話冇文化，早排特登去咗香港藝術館睇「龐比度中心珍藏展」；𠵱家九鐵展出嘅雖然係複製品，不過如果經過開尖東站，都會去昅昅，keep住啲藝術氣質。