「LaBrasserie」係香港頂尖兒法國餐廳之一，城中名流、名人明星當呢度係私家飯堂絕對有原因，經理Simon話：「因為呢度可以食到法國名菜──血鴨，全港唔多過兩間餐廳可以食得到㗎。」除咗血鴨，餐廳一對可愛Twins侍應Candy同May一樣咁受歡迎，知我嚟訪問，隔籬枱食客即時起哄，口花花話：「呢度有紅酒賣，你兩個個樣18歲未夠居然夠膽喺呢度做侍應？係咪請童工先？」我馬上過去驗明「證身」，放心，絕對夠秤。
佢哋異口同聲話：「幫襯開嘅多數都係熟客，見得多，大家感覺好似家人。」不過餐廳賣得酒，總有啲麻煩嘢啩？「煩在要識睇邊個客人開始醉，如果見佢面紅紅醉醉哋都仲落單追酒飲，我哋就要小心婉拒，𠱁吓佢不如飲番杯清水清茶之類解解酒。」咁有無客見你兩個「童工」咁可愛，請你哋飲番杯先？「都有嘅……不過諗落，又唔知算唔算有……話說我哋喺返工時間絕對唔可以飲酒，對呢類要求當然要婉拒啦，點知有個客神心到買定支酒等我哋放工，其他客人見到，就口多多話：『佢哋鍾意食西貢X記糖水多啲喎。』第二日放工，真係見到佢買定兩碗糖水等我哋收工喎……」買糖水等收工，擺明想追你哋喇。
記者：朱崇德
攝影：陳偉強
蟹肉雲吞配海鮮香草汁$168
蟹肉雲吞厚身又大隻，滑溜海鮮汁底勁重龍蝦鮮味，好Creamy蟹肉自動滑入喉嚨。
法國雪魚柳配煙肉卷$258
魚扒勁滑勁重磅，用煙肉捲住煙熏，香味完全滲入魚肉，下面中東米配青口汁，勁有咬口。
心太軟朱古力布甸$88
甜品心太軟加雪糕，賣相成個立體藝術展品咁靚，用60%可可做成，未食已經香到震。
食客評分
LaBrasserie（21137925）
地址：尖沙嘴廣東道13號馬可孛羅港威酒店
