每逢佳節倍思親，程翔太太劉敏儀喺中秋佳節，當然最掛住獨自喺看守所過節嘅老公程翔。當其他人一家大細，齊齊整整去食月餅，去玩燈籠，去公園賞月，劉敏儀只可以孤伶伶一個，捱過每一個月滿高懸嘅晚上，「迎月嗰晚，我就係一個人望住個月光，過咗一晚」，真係聽到都令人心酸。
其實，程翔家人早前已經就程翔被判間諜罪成，向北京第二中級人民法院提出上訴，但法院至今都未有任何裁決。劉敏儀話，真係唔知法院幾時審理案件，家人亦都冇獲再探望程翔嘅機會。
不過，程翔代表律師早前探過程翔，程太得知程翔雖然瘦咗好多，但思路仍然清晰，整體情況ok啦。程翔家人曾經透過律師向程翔送上月餅，但因為看守所唔准帶藥物及食品入去，程翔無福消受，佢仲叫律師將月餅轉送畀看守所所長，但所長就死都唔肯要。
雖然程翔未能享用家人送上嘅應節食品，但看守所聲稱，已經買咗最好嘅港式月餅畀程翔，希望佢可以感受到少少節日氣氛啩。由於朋友驚劉敏儀會悶，紛紛提出陪佢食飯過中秋。劉敏儀梗係好感動，但佢最希望嘅，當然係下一年中秋，老公已經返嚟自己身邊，同自己一齊觀賞又大又圓嘅月亮啦。其實除咗程翔，內地仲有唔少異見者同維權人士失去自由，無法人月團圓，支聯會噚晚喺尖沙嘴鐘樓側邊，搞咗個中秋民主燈火行動，播放民運錄影帶、猜燈謎同收集簽名。那邊廂。長毛梁國雄就同社民連送咗個爛芋頭畀特首，要求佢正視貧富懸殊問題，等低下層都可以開開心心過節。