侍仔：陪完女友賞月，深夜睇吓友賽同歐國盃外圍賽都係好節目。
菠蘿文：招積，你話今晚英格蘭主場對住馬其頓可唔可以大勝呢？
招積域：馬會「讓球主客和」開到英格蘭[-2]，唔係主場就大晒吓話？馬其頓唔可以低估，仲貼馬其頓係出線「黑馬」。作客贏人哋1:0就信心爆棚？我依然撐馬其頓「客勝」加波膽1:1，誓要拆英軍「囂張招牌」！
侍仔：周六晚戲碼，唔係強弱對碰就係「海軍鬥水兵」，意大利對烏克蘭算係較好睇一場。招積，你要邊隊？
招積域：「軍刀」有態就話冇佢唔得啫，但𠵱家佢喺車仔踢到咁沉，就算出到場都係一無是處。烏克蘭殘陣，揀意大利贏1球啦！
菠蘿文：以為你會死撐烏軍㖭，算你都仲有啲理智。
扒大冷揀哈薩克
招積域：各位，又有1場爆冷可期賽事：哈薩克主場對波蘭！哈薩克世界盃外圍賽仲係場場俾人狂數，但近兩場已經連和比利時同阿塞拜疆，今次主場對波蘭真係可以偷到雞！
侍仔：費事理你！
菠蘿文：既然歐國盃冇好戲碼，不如玩吓友賽。巴西去中東搵錢，今次就搵正科威特。
招積域：不如估個不可思議嘅賽果，就係巴西輸波！
菠蘿文：唔好玩到咁偏激啦，巴西雖然收咗戲金，但如果輸咗波就暴動都似，都係正路巴西贏3:0！
文：高洛文