今年重售嘅一手貨尾，絕大部份難逃劈價命運，好似東涌映灣園、深井碧堤半島、荃灣爵悅庭等，少則劈一、兩成，個別要勁劈三成以上先至去到貨。啱啱入得伙，近期重售嘅火炭晉名峰，稱得上淡市奇葩，貨尾單位仲賣緊當年樓花價錢，而且成交仲幾活躍㖭。
呎租新界豪宅稱冠
利嘉閣郭兆輝話，繼9月份賣咗兩間一手貨尾，10月份再賣出兩間，同屬山景單位，其中E座低層B室，1412方呎，成交價920萬，呎價6516蚊。另一宗係D座中層C室，1128呎，成交價738萬，每呎6543蚊。兩單位呎價同04年11月開售時差唔多，當時山景單位呎價由5300蚊起，至最高賣到8000蚊。
晉名峰𠵱家仲剩番唔夠20個一手貨尾，同180個二手放盤，業主大部份唔使蝕賣，真係多得發展商南豐集團冇壓力賣樓，唔使出絕招劈價散貨，唔係班二手業主就慘囉！除咗冇劈價之外，個盤另一殺食之處，係租務旺兼呎租驚人，過去個零月已有7宗租務成交，呎租最高去到29蚊，稱冠新界豪宅，比同區嘅駿景園高出三成，就算賣唔去都可以收住租先，總好過丟空等蝕賣。
電郵地址[email protected]