鄔維庸病逝，鄔家上下當然好傷心，但都要忍住傷痛辦理喪事。好在鄔醫生生前都廣結唔少朋友，大家都好主動咁幫鄔家，港區人大召集人袁武就係其中一個要為呢件事奔波嘅人。袁總話鄔家得太太同一個仔仔，所以有人幫手分擔吓都好嘅。
袁總話鄔醫生貴為人大代表，又係基本法委員會委員，當然有中聯辦協助辦理後事，但相信葬禮未去到政協副主席安子介嘅層次。由於鄔醫生係天主教徒，所以喪事以西式為主。至於係咪14號出殯？袁總話未定，另一位人大代表葉國謙就話14號係好初步嘅時間，一切未拍板。政界盛傳全國人大常委會副秘書長喬曉陽會發送悼詞，代表中央悼念呢位左派悍將。雖然唔知真定假，但中央對鄔醫生有少少心意表示都好正常嘅。