近年單鏡DC市場夠晒熱鬧，Canon、Nikon鬥出新機，連SONY、Panasonic都分一杯羮，不過富士一於少理，04年7月出咗部S3Pro後，一路「歎慢板」唔出新機！近日終於肯公布後繼機；新機居然跳過S4Pro名稱，直接叫S5Pro，筆者問過香港富士，公關話日本公司嫌「4」字唔「老泥」喎，不過F4400呢類一串過就唔同！
入番正題，新機加入富士剛玩到興起嘅「認人樣對焦」，官方話只要如常半按快門，便可即時辨認出人樣同校啱焦距，最多仲可10張臉一齊辨認，呢個功能算係單鏡DC界中首次出現！另外加入新技術去減低DC天敵嘅「噪訊」（Noise），首先係核心SuperCCDSRPro可處理更廣闊嘅動態範圍，由陰暗到高光位都能捕捉自然順滑嘅影像，唔怕太暗或太光時會損失太多數據。另外優化咗機內「低通濾波器」，能有效減低噪訊，富士更誇下海口話ISO3200高感光度底下，仍可有滿意順滑嘅表現。實際如何，即管等07年年頭推出後便揭曉。
記者：徐影龍