𠵱家乜嘢都好商業化，就連報告天氣都一樣，幾年前已經見到天文台啲職員講天氣，晴朗的日子可以用「萬里無雲」嚟報告天氣，呢兩日又話迎月個月亮「最靚」，話昨晚會有幾陣雨，又話唔會影響市民賞月嘅「興致」，究竟係用乜嘢標準，真係唔知，不過，個月亮有幾靚，落雨賞月有冇興致，對於股民嚟講，就睇你呢排係造好定造淡，個市近日咁威猛，賺咗錢嘅股民就算合埋眼都會覺得個月亮好靚。
滙控C輪3864：前日個市靠隻大笨象挾高破關，隻象養精蓄銳咗咁耐，一飛上去，邊有咁快停。昨日滙控（005）再創新高，報收146.10元。大笨象係好多基金同散戶嘅愛股，就算同佢談戀愛，都唔會有邊個分析員會話你唔啱，大象已興奮，股民已雀躍，班好友大戶梗係會繼續保護住呢隻象為個市護航，股價嚟到呢個位，點都要上試150元。
隻滙控C輪3864昨日報收52仙，仲有66日到期，溢價只係0.7%，轉入價內，正股有勢，對沖值0.78，好有吸引力，難怪單日成交有1.5億元，槓桿率28.1倍（有效20.4倍），正股升上150元，3864應該會升上83仙樓上，𠵱家嘅引伸波幅11.4%，係偏低嘅水平，如果引伸波幅升上去，隻輪嘅升幅仲大，可以喺55仙樓下買番啲，正股跌穿144.50元，沽出止蝕。
俊樺