一班良朋返母校體藝中學踢波，實情都係搓兩腳，重要嘅係了解各人新動向！點知，花名叫「甜筒」嘅，一腳啄咗個波入泳池，仲要正正在水中央，點執都執唔到……結果我哋抬埋兩個水球龍門出嚟，鍊番場水球先！從前讀書踢波嘅畫面，漸漸喺腦海浮現！
帶隊出征增廣見聞
嗰陣做獎學金球員，一放學即刻彈返體育學院，跟黎Sir、陳Sir、郭Sir練波，幾位教練不辭勞苦，教導的不但止球技，還有言行舉止，做人處事；又帶我哋南征北討，增廣見聞，突破咗填鴨式的中學時代，令我沒齒難忘！
早前黎Sir（黎新祥）突然宣布帶領港隊踢畢亞洲盃後請辭。實在悲喜交集，悲香港足球發展一大損失，喜黎Sir能夠遠離是非之地。所謂「有捨才有得」，縱然不捨得黎Sir辭任，也應替他高興，因為毋須再理會閒人的閒言閒語，有更多時間享受人生！
黎Sir教過我踢波，係我師傅，係應該尊敬嘅前輩！相信無人可以決定師傅嘅去或留！
馮嘉奇
碩士球員讀萬卷書，親身歷盡各國足球風情。