好淡周四激戰過後，好友吃得太飽，昨日不為已甚，而淡友則反攻無力，形成牛皮悶局，恒指全日波幅只有83點，最後微跌4點，收17903。期指尾市跌幅則略擴大，跌56點，收17923，高水收窄至20點。
本周只有4個交易日，但恒指仍大升360點或2.1%。周線圖以大陽燭上升，走勢雖勁但已升近保歷加通道頂，除非再有利好消息配合，否則不易再撐穿保歷加通道頂，正常計，下周恒指造旗整固的機會較大，除非滙控（005）又出現類似中移動（941）升到你唔信的走勢，下周向上爆破150元。
輪商力推和黃輪
兩隻巨無霸唞氣，相信好多人都估會由落後的地產股及和黃（013）接力炒上，其中和黃市值夠大，要挾指數較合用。和黃本周只升0.65元，不足1%，炒落後條件充份。其實只睇吓各大窩輪發行商昨日力推和黃C輪，大家亦應估到下個星期藍籌升邊隻。
和黃股價落後當然有原因，有唔少利淡消息困擾，但大戶只是短線來舞高弄低指數，自然毋須考慮咁多。
如果唔怕冒風險，下周一可留意和黃C輪短炒，但就宜見好就收及只玩即市，和黃昨守在20日線（69.47元）前收市，下周一炒上71-72元水平，炒輪應有不俗水位食糊。
趙飛雲