國際鋼琴家郎朗噚日以電器品牌代言人身份出席活動，賭王何鴻燊同四姨太梁安琪、前特首夫人董趙洪娉都畀面捧場。郎朗透露，𠵱家正透過入境處嗰優才計劃申請嚟香港，因為成日都要周圍飛，用中國護照成日要申請簽證，自己又好忙，所以想攞個特區護照，比較方便。
郎朗係蜚聲國際嘅音樂家，佢話美國、奧地利都試過想畀護照佢，但佢又唔想失中國人身份，特區護照就係最佳選擇，因為有成百幾個國家唔使簽證，加上香港係個好「棒」嘅城市，佢好鍾意嚟香港食海鮮同shopping，所以咪申請做香港優才囉。
郎朗仲同八方講，曾特首係佢嘅personalfriend，有份畀意見佢參加呢個優才計劃。有咁犀利嘅鋼琴家申請做香港人，梗好，但八方認為呢個優才計劃目的係為吸引多啲勁人嚟香港，增加香港嘅競爭力，郎朗做咗香港優才之後，除咗有機會拎本特區護照周圍飛，八方都希望佢真係可以為提升香港競爭力出一分力。