以後每個星期五，都會見到呢個新欄目。「任你遊論」的意思就是希望和讀者一起分享旅遊的種種事情，你有問題，歡迎即刻send電郵嚟：[email protected]齊齊討論啦！
Q:請問如果想去日本睇紅葉，咩時候去邊度睇最靚?
A：十月份秋高氣爽，好多地方嘅紅葉都經已換好紅衫等人欣賞。不過唔同縣嘅紅葉盛開時間就度度唔同，北部各縣開得比較早，十月頭至十月中就係最靚嘅時候。之不過到了十月中，最好都係往南走，山形縣、岩手縣同宮城縣等中部城市就最靚。十月度唔到期唔緊要，去到十一月仲有得睇，但係就要再南下去京都等地，同樣可以感受紅葉處處嘅氣氛。如果十月上旬去日本睇紅葉，我嘅首選梗係北海道啦，一來天氣未係好凍，二來十月頭亦係北海道紅葉最盛綻嘅時候，好似定山溪、支笏湖同登別地獄谷等，就係睇紅葉嘅好地方。我最鍾意係去定山溪，紅葉又紅又靚之餘，仲可以浸埋溫泉，浸住睇、睇住浸一樣得。
紅葉追蹤網:
1.www.so-net.ne.jp/season/koyo/index.html
2.www.rurubu.com/season/autumn/koyo