上海單廉政風暴，你話係權力鬥爭又好反貪又好，唔止港人關心，喺上海有千絲萬縷政經關係嘅人仲關心。但照計香港廉署都關心，因為同原上海市委書記陳良宇個細佬陳良軍合作發展上海東八塊項目嘅周正毅，到𠵱家仲係廉署嘅通緝犯。
八方噚日撞到位廉署高層，問佢呢單嘢有冇收到乜嘢風，因為有傳早排出咗獄嘅周正毅再被收監受查，但佢就貫徹廉署作風，死口話唔知周正毅嘅去向。佢話就算周正毅早排放咗監，香港同大陸無移交逃犯協議，佢唔返嚟都冇佢符。
不過，講到實施咗兩個月左右嘅《截取通訊及監察條例》，佢就話雖然仲磨合梗，啲法官審批時亦唔手鬆，但駁回嘅廉署申請唔多。佢仲話，今年頭八個月廉署案件嘅定罪率破歷來紀錄，有成88％，以前通常得八成左右。
廉署明年底又有另一單喜事，就係新總部入伙，但廉政專員黃鴻超到時有冇得搬入去，據講佢自己都唔知，因為煲呔連任之後，明年7.1班主要官員都會大執位啦。