肥姐沈殿霞接受通膽管及切除部份肝臟手術後感不適，於上月中入住瑪麗醫院深切治療部（ICU），一度傳出病重，其愛女欣宜對母親病情三緘其口，情況令人擔憂之際，前日肥姐被安排由ICU轉到私家病房休養。正當外間以為肥姐的病情有起色，欣宜和肥姐好友陳淑芬昨日均表示她的病情進展根本不如想像中樂觀，搬離ICU只為避記者。
肥姐愛女鄭欣宜昨日兩度往瑪麗醫院探望母親，其間她接受無綫節目《東張西望》訪問時，直認母親的病情未有好轉，欣宜說：「其實佢轉去普通病房，並唔係因為佢health、情況穩定咗，並唔係咁囉！經過上次俾人偷拍之後，佢每晚都瞓唔到覺，頭先啱啱打完畀醫院，佢哋話佢血壓高，所以轉去普通病房係希望有個人可以24小時照顧佢，等佢可以安心瞓。」
現時身在美國的陳淑芬昨日特別接受長途電話訪問，提到肥姐搬離ICU入住私家病房的真正原因時，她勞氣地說：「之前有個印傭偷入去，指示佢咁做嘅人係殺人兇手，件事發生咗之後嚇親肥姐，佢冇覺好瞓，而且血壓飆升、糖尿病情況唔穩定，佢好擔心有人入咗嚟都唔知。所以醫生巡病房時，肥姐就要求轉去私家病房，咁就可以24小時有人把守間房，可以安心瞓覺。其實醫生唔係咁贊成，因為肥姐嘅病情唔係外間諗得咁樂觀，轉房並唔係一件好事。」
好友氣憤
「一定會追究到底」
陳淑芬續說：「肥姐唔係冇乜事㗎，醫生本身想佢穩定啲先轉房，但佢又瞓唔到，個決定都太匆忙，所以嚟唔切通知欣宜同肥姐屋企人。醫生話佢抵抗力好弱，留喺ICU安全啲。我會盡快返嚟香港，揪出指使印傭嗰個人，一定會追究到底。」
據悉，肥姐雖入住深切治療部內的獨立病房，但因該部門外不可安排保安人員把守，保安不如私家病房嚴密。昨日醫院便安排了一名保安在肥姐入住的病房樓層站崗，着採訪記者留在記者區及不准喧嘩，明顯加強防衞。肥姐兩名姊姊上午往探望時，其中一名姊姊說：「肥姐好好，唔使擔心。」其後她又謂：「佢呢排精神差啲，可能俾人嚇一嚇，咪過嚟私家病房休息囉。」欣宜隨後到達時則有無綫《東張西望》攝製隊全程在旁直擊，主持還送上生果籃給肥姐，由欣宜代收。
其後欣宜在曾志偉、張學友、施南生及樂易玲陪同下，在將軍澳電視廣播城召開記者會，吸引半百傳媒到場採訪。不過欣宜的說法卻與接受《東張西望》訪問時有出入，她說：「媽咪情況好好多，噚日ICU轉私家病房，好多uncle打電話問，好多朋友想探媽咪，但係媽咪好需要休息，好番啲等佢自己出嚟同大家交代病情。」記者提到陳淑芬形容肥姐的病情不如想像中樂觀時，欣宜只是笑着表示不會回應此問題。
曾志偉則多次表示肥姐很快便會康復，屆時會親身交代病情，他說：「肥姐好咗好多，心情好好，不過之前有好多朋友探佢，令到佢血壓、血糖好唔穩定，同埋估計佢轉病房，會有好多人探佢，再次影響血壓、血糖，加上肥姐呢個時候係好易受感染，希望大家唔好去探佢。」施南生在會後透露早前發生的外籍人士扮家務助理偷拍事件，已交由警方處理。
秋官擔憂
「佢應該聽醫生話」
結束記者會後，欣宜再次折返醫院探望母親，逗留約半小時便與兩位姨媽一同離開，其間她表示記者會是肥姐安排舉行，又謂正物色看護照顧母親，問到肥姐能否在今天中秋節出院團圓時，她說：「唔好啩！」
對於肥姐因遭偷拍而撤出ICU，其前夫鄭少秋昨在電話中回應說：「吓？真係呀？我剛剛同個女（欣宜）通電話，佢仲同我講話媽咪冇乜事㖭，我都要了解吓情況先，不過無論點都好，我覺得佢應該聽醫生話。」
採訪、攝影：楊潔雯、葉君海、馬建華、卓美娟
